Tuesday, December 16, 2014

सय रूप्याँको डण्डी, पैंतीस रूप्याँको कपडा

तीनकुने कलंकी रिंगरोड खण्डलाई फराकिलो बनाउने भनेर काम शुरु भएको निकै भेसक्यो । सुस्त गतिको गौरवशाली परम्परालाई कायम राख्दै भइरहेको कामका कारण त्यो बाटोको अवस्था कस्तो छ भन्ने भुक्तभोगीहरूलाई थाहा छ । आजकल रिस उठेर कसैलाई गाली गर्दा "गो टू हेल्" नभनेर "गो टू सातदोबाटो-कलंकी भनिन्छ रे । सातदोबाटोबाट एकान्तकुना जाने खण्डमा कुसुन्ती चोकको ओरालोबाट दायाँ मोडिएर प्रशासनिक प्रतिष्ठान तिर जाने बाटो पछिल्लो वर्ष पीच गर्दा उकालोको एक टुक्रा चाहिँ त्यत्तिकै छोडिएको छ । हात्ती छिर्‍यो पुच्छर अड्क्यो भनेर त्यति पीच किन नगरेको होला भन्ने लाग्थ्यो । त्यस्ता टुक्राहरू धेरै ठाउँमा छोडिएको हुन्छ । एक दिन सडक विभागका एक ईन्जिनियरले प्रसंग उठ्दा आँखा झिम्काउँदै भनेका थिए,
"हामी कसरी बाँच्ने त्यति नभए?"


उनका अनुसार पीच गर्दा सय डेढ सय मिटर छोडेर बाँकी पछि फेरि गर्दा ६-७ लाख कमाइ हुन्छ रे। कतिसम्म सत्य हो तिनै जानुन् ।

जे होस् कुसुन्ती चोकबाट जाने ठाउँको कुरा गर्दा त्यसको तल रिंगरोड विस्तारको लागि खनिएको छ । त्यो उकालो मोडिने ठाउँमा एउटा डरलाग्दो धराप छ । उताबाट आउँदा र यताबाट जाँदा त्यो धराप र बाटो भत्किएको भ्वाङ्ग पटक्कै देखिंदैन । सम्म बाटो जस्तै देखिन्छ । तर त्यो थाहा नपाएका सवारी साधन त्यसमा परेपछि धेरै ढीला भैसकेको हुन्छ । 





विशेष गरेर राति त एउटा न एउटा शिकार त्यसमा परेकै हुन्छ । एउटा गाडी त देब्रे पाङ्ग्रा त्यहाँ पर्दा अर्को पट्टिको दुबै पाङ्ग्रा हावामा उचालिएर झण्डै तीनचार मिटर तल खँगारिएको थियो । यदि कुनै गाडी तल पल्टियो भने मानिसको ज्यानै जान सक्ने अवस्था छ त्यहाँ । यस्तो खतरनाक अवस्थामा रहेको त्यो धरापमा एउटा साधारण सूचनासम्म राख्न पनि सम्बन्धित निकायले ध्यान दिएको छैन ।



म आज घरबाट निस्कँदा झोलामा एउटा कूटो लिएर निस्केको थिएँ । बाटोमा निर्माण सामाग्री पसलबाट १०० रूप्याँको एउटा डण्डी किनें, कपडा पसलबाट ३५ रूप्याँको आधा मिटर रातो कपडा । नजीकैको टेलर पसलमा बिट सिउन लगाएँ । त्यस धराप भएको ठाउँमा त्यो झण्डा गाड्न खनुन्जेल त्यहीं नजीकैका पसलेहरू मलाई घत मानेर हेर्दै थिए । जब झण्डा गाडेर मैले चारैतिर हेरें, अनि मात्र हेक्का गरें, बाटोको दुबै तिर अरू पसलहरुसंगै दुईवटा टेलरहरू पनि रहेछन् ।

आशा गरौं, अब शायब त्यो धरापमा कोही पर्दैन कि?



एकै टेकमा तीन अन्तरा

कान्तिपुर कोसेलीमा प्रकाशित बम्बै, २०...... गति रोधक पुढे आहे सडकको किनारामा ट्राफिकको सूचना गाडिएको बोर्डमा मराठीमा लेखिएको थियो, ...