यस देशमा कसैले केही गरेर अलिकति दाम कमायो भने कसैले देख्न सक्दैनन् । जाने पनि नजाने पनि सब त्यही काममा खनिएर लागिपर्छन् । आफू पनि डुब्छन्, अर्कालाई पनि डुबाउँछन् । हुन पनि हो, मानिसलाई संसारमा अरुले गर्ने काम जति सजिलो अरु केही पनि लाग्दैन । तर, बिचरा फाफुराले त दाम कमाउने काम पनि गरेको होइन । अलिअलि नाम कमाए ठूलै कुरो हो । त्यै पनि सकिएको कहाँ थियो र ? तर, त्यसमा पनि आरिसेहरुको वक्रदृष्टि लाग्यो । पहिलेपहिले त कुनैकुनै पार्टीका एकदुई नेताले मात्र फाफुराले जस्तो हावा खुस्क्या कुरा गर्थे । आजकल त हरेक पार्टीका हरेक भनेजसो ’हपामु(छाछेछो) नेताहरू को भन्दा को कम भनेर फाइँफुट्टी हाँक्न थालेका छन् । यसरी त फाफुराको कामै धरापमा पर्ने भयो । तर, त्यसको उजुरी गर्ने कुनै ठाउँ छैन । फाइँफुट्टीको हक र अधिकारको लागि त लडिदिने पनि कोही छैन ।